gedigte - sterstof en vriende

a skate in the park

2011-10-12T19:58:00.002+02:00

“The wind of change blows straight
Into the face of time” - Scorpions

al langs die Moskva-rivier

met neut- en ballonverkopers

skaats sy weg van Ferriswiele

weg van balalaika lugkastele,

wit staal verknog aan witter ys

gly langs winter standbeelde

- nes haar marmer bekendes,

gesuspendeer in binêre grys

Gorky park se formele tuine

laat bladsye terug flapper-blaai

na voor winde van verandering

se rooi Oktober en winterpaleis,

vir net een skaats-rondte

om die geysde fontein

laat sy ongesmelte foto’s

spatsels geparste laventel

van vervaagde somers saai

’n bevrore meer

spieëlbeeld grafte

van gevalle helde;

sy lem girts-girts-girts

sny oor groteske gesigte

- ballonne bars wondrooi

teen witste mandorla sneeu,

en onder haar sabeljas

klem sy steeds gekneg

haar eie lyke stywer vas

slapende skone

2011-10-11T10:36:00.004+02:00

"I'm selfish, impatient and a little insecure. I make mistakes, I am out of control and at times hard to handle. But if you can't handle me at my worst, then you sure as hell don't deserve me at my best." ? Marilyn Monroe

en as jy, Mnr. die Prins met jou vingerpunt

aan haar slapende skoonheid sou raak

wat moontlik ’n Medusa slangkop

met duistere demone wakker maak,

katpupille wat in goudgeel oë flits

en ’n bitsige vuurtong

wat skilderye, dagboek en joernale verskroei

so gevlym dat selfs matrose en advokate

aan’t hol kan raak ...

dalk ’n menopausal ou wyf

met slaap verlêde dye-vaal hare

toegeswel, be-aarde allergie-oë

en ’n droë spoegstreep oor ’n rimpelwang

wat natgesweet miaauend klae

oor tientalle, alle shapes en sizes

dokters, pille en kaste vol verslae ...

of miskien ’n wulpse Femme fatale feeks

met rook versluierde kohl-kykers,

’n klam uitlokkende soenbare bek

en fyn berekende pop-up borste

wat oor niks vermoede slagoffers

gewillig pruilend purr en vingernael aai

dan slow-kill verorber en bene behaaglik aflek ...

sou jy dan kan waag dat sy ooit sal ontwaak

as hierdie, met al die ander mooi ook waar is?

realiteit is ’n gatskop risiko nagmerrie,

wat sélf veel eerder

vir die slapende skone

Madame Doringrosie (met of sonder katte)

ver agter haar ondeurdringbare heining

toringhoog onbereikbaar,

en veilig, aan die slaap sou hou

PhDoubleD

stem van stilte

2011-10-10T20:06:00.002+02:00

(‘n pantoem)

daar was ’n tyd toe ek jou geken het
jou lyf se kontoere onder my vingers
soos Bocelli vokale wat adagio oor
la voce del silenzio, die stem van stilte

jou lyf se kontoere onder my vingers
het braillestil geword en ek hoor net
la voce del silenzio, die stem van stilte
onder my vingers want jou liggaam

het braillestil geword en ek hoor net
die eggo’s van a time to say goodbye
onder my vingers want jou liggaam
se afwesigheid het plek gemaak vir

die eggo’s van a time to say goodbye
gestorwe weerklanke en Bocelli vokale
se afwesigheid het plek gemaak vir
tragiese ironie van ’n eens vivere

gestorwe weerklanke en Bocelli vokale
la voce del silenzio, die stem van stilte -
tragiese ironie van eens vivere, want
daar was ’n tyd toe ek jou geken het

lemoene mond

2011-10-08T15:06:00.004+02:00

in die antieke Barrio del Carmen
met poorte en ringmure in ou Valencia

(tangelo jou stortnat warmte teen my wang)

blom ons gesteelde ure malvarooi
oor die gotiese traliewerk van ons balkon

(drink ek dorstig die druppels van jou rug)

bo Placido Domingo straatmusikante
en boheemse kleurryke kunstenaars

(skil ek honger die handdoek van jou lyf)

waar borriegeel paella en garnaal aromas
deur eksotiese straatjies nessun dorma

(my lippe clementine-klam oor jou vel)

en perdepote se klip-klop tydsame wa-trek
klinkend weg Lorca in nouste nou stegies

(stroom jou sap roomsoet oor my ken)

na die San Miguel de los Reyes klooster
waar ek biegbid met my lemoenemond

onvoltooide portret

2011-10-07T08:23:00.006+02:00

blinkswart lokke
word skeefkop
bekyk innie spieël
en net daar
gooi sy sexy
by die deur uit
en punk haar hare
platinum blond
klaar fertig
met society stront

haar body poep
’n woordlose protes
teen kamtige groen
eco-friendly
camel-menthol
sigare.t.t.e

sy’s ’n pilpopper
fanatic
hoofpynstopper
frenetic
Comprals
getestamenteer
vir die hiernamaals -
’n móet virrie kis

sy kan
blog Facebook en twitter
k@k-praat ’n specialty
sy’t selektiewe
gehoor en geheue
haar kamera
memory card
die size van ’n floppie

sy torque die Karoo
teen 230 km p.u.
singend met
Blue October
en Koos Kombuis
sy gallop
in Botrivier boorde
praat met poue
kolganse en makoue

annerster
en weird is sy
lewenslank
die outsider
sy’s die crone
van Wateruintjieskuil
wat magic maak
met woorde

enigmaties onkonvensioneel

2011-10-07T08:13:00.010+02:00

wat vir jou gelyk het soos ’n borswering

was toe ’n poort ’n antieke ingangspoort

na ’n versteekte norm-vreemde gebou

en deur brons beslane ysterhout deure,

Melchizedek en Judas Maccabeus

betree jy haar innerlike katedraal -

regtig alles behalwe

harmonieus ontwerp

met Romaanse

middeskip en friesrand

Gotiese kore en

Barok dameskapel,

die lot na-oorlogs

aangelap en herstel

selfs die musiek

is ietwat diskordant

wanneer klassiek

met metal meng

en Rammstein

vir Rachmaninoff

nooi na hul weeklikse

onortodokse passiespel

met vurige dodedanse

in haar graftombes

op heilige koeie-

en fariseër sarkofae

is hier geen selibate

beskroomde kloosterling

in dié basilika te vinde nie

slegs ’n Deborah met palmtak hande

en outentieke profete gebrandskilder

in haar deurskynende glashelder oë

en mag jy aansit by haar avondmaal

mits jy jou vooropgestelde skoene

by haar ingangspoort se drumpel laat.